Bakit ba ang bata’y alagang-alaga
Ng mga magulang na ama at ina?
Kapagka ang bata’y naapi’t nawala
Mga magulang din unang lumuluha!
Matandang kapatid ay nakaalalay
Sa bunsong kapatid karugtong ng buhay;
Kapag umiiyak o kaya’y nasaktan
Musmos pang kapatid pinagyayaman!
Madaling sagutin ang tanong na bakit
Mahal ng magulang at mga kapatid
Mga batang musmos, maganda ma’t pangit-
Sila ay karugtong ng buhay, pag-ibig!
At ang mga bata habang lumalaki
Hangad ng magulang sila ay matangi –
Mag-aral nang husto at maging mabuti
At maging huwaran sa bawa’t sandali!