Sana ang daigdig palaging masaya
Walang nag-aaway at wala ring gyera;
Ang lahat ng tao ay nagkakaisa
Sa isang layuning kapatiran pala!
Pagka’t tayong lahat ay magkakapatid
Pantay-pantay lamang, bigkis ng pag-ibig;
Ang pagmamahalan ay taos sa dibdib
Magulang at anak laging magkalapit!
Sana tayong lahat pawang nabubuhay
Sa mabuting gawa’t ginintuang pakay;
At ang pulitika – itakwil ng bayan
Upang sa daigdig lahat pantay-pantay!
Sana ang Maykapal tanging mamahala
At dito’y wala ng taong masasama;
Masasamang tao’y hindi na nalikha
Upang sa daigdig lahat ay payapa!