MANILA, Philippines — Walong katao ang namatay habang pito ang nasugatan makaraang magsalpukan ang isang pampasaherong van at delivery truck sa Brgy. Sto. Cristo, Sariaya, Quezon kahapon ng umaga.
Kinilala ni Police Lt. Col. Carlo Caceres ang mga nasawi na sina Eleodoro Bermudo, van driver; mga pasahero na sina Danilo Dapadap, Villamor Concepcion; Jaime Bermudo; Francisco Bermudo; Sarah Joy Concepcion; MJ-2 anyos na batang babae; at Sarah Concepcion.
Sugatan naman sina Crisanto Pascual, truck driver at mga sakay na sina Ariel Caliro; Louis Aldea; Antero Vergara; Gilbert Bermudo; Jomar Caliro; at Anjo Caliro.
Sa inisyal na ulat ng ng Sariaya Municipal Police Station, naganap ang aksidente, alas-5:50 ng umaga sa Maharlika Highway sa Sto. Cristo, Sariaya, Quezon.
Nabatid na tinatahak ng pampasaherong van ang direksyong patungong Maynila at patungo naman ang delivery truck sa direksyon ng Bicol nang kainin umano ng driver ng una na umano ay nakaidlip ang linya ng delivery truck kaya’t nagsalpukan.
Sa lakas nang pagkasalpok ay halos nawasak ang pampasaherong van na ikinasawi ng walong pasahero habang ang iba pang pasahero ay isinugod sa ospital. — Ed Amoroso