Pananakit ‘di na kinaya
MANILA, Philippines — Hindi na nakayanan ng isang misis ang laging pananakit ng lover kaya’t lumaban na ito at inatado niya ng saksak nitong Sabado ng gabi sa loob ng kanilang bahay sa Quezon City.
Ang biktima na idineklarang dead on arrival sa FEU General Hospital ay kinilalang si John Louis Solomon, 22, bodegero, residente ng No. 234 Maya St., Barangay Commonwealth, Quezon City.
Nasa kustodiya naman ng Quezon City Police District (QCPD) ang suspect na si Krizel Baterna Concepcion, 22 ng nabanggit ding tirahan,
Sa salaysay ng kapatid ng suspek na si alyas Angel, alas-8:00 ng gabi habang siya ay nasa banyo ay narinig niya ang kapatid at ang biktima na nag-aaway.
Nang kanyang puntahan ay nakita niya ang biktima na naliligo na sa dugo habang umiiyak ang kapatid at humihingi ng tawad.
Batay naman sa kuha ng CCTV dumating ang biktima sa bahay at nagkaroon ng mainitang pagtatalo sa suspek at nakita na kumuha ng kutsilyo ang huli at sinaksak ang una sa dibdib malapit sa puso.
Humingi ng tulong ang suspek sa kapatid at dinala sa ospital ang biktima na idineklarang dead-on-arrival.
Ayon sa suspek na nagdilim na umano ang kanyang paningin dahil sa hindi na niya matiis ang lagi umanong pananakit ng biktima sa tuwing sila ay mag-aaway.
Kaya nang magkaroon sila ng pagtatalo ay inunahan na niya saksakin ang biktima na kanyang nakasama ng 6-taon.