MANILA, Philippines — Nasawi ang dalawang hinihinalang drug pusher makaraang makipagbarilan sa mga pulis sa isinagawang buy-bust operation sa Barangay Poblacion East II, sa bayan ng Aliaga, Nueva Ecija, kahapon ng madaling-araw.
Kinilala ng pulisya ang dalawang napatay na drug suspect na sina Joseph Mateo at Cris Franco Sanopo, kapwa nasa legal na edad at residente ng Barangay Aduas, Cabanatuan City.
Ayon sa Aliaga Police, bandang alas-2:07 ng madaling-araw nang isagawa ang ang drug buy-bust operation laban sa dalawang suspek at nang magpalitan na ng “items” ay biglang nakahalata ang dalawang suspek at tinulak umano ang dalawang pulis na kanilang ka-transaksyon at bumunot ng baril na kalibre .38 at pinaputukan ngunit sumablay.
Dito na gumanti ng putok ang mga pulis at napatay ang dalawang drug dealer na kinumpirma ng Cabanatuan City Police na kabilang sa kanilang drug watchlist.