MANILA, Philippines — Isang pulis ang dinakip ng mga operatiba ng PNP-Integrity Monitoring Enforcement Group (PNP-IMEG) matapos maaktuhang pumupusta sa isang cockpit arena sa Brgy. Tagaran, Cauayan City, Isabela kamalawa ng gabi. Ang nasakoteng pulis ay kinilalang si Police Senior Master Sergeant Kennethb Galope, 39, residente ng Brgy. Quibal, Delfin Albano ng lalawigan.
Ayon kay Police Regional Office (PRO) 2 Director Police Brig. Gen. Angelito Casimiro nasakote ang pulis na aktong tumataya sa sabungan sa Jaycee Clay Cockpit arena sa Brgy. Tagaran, Cauayan City ng naturang probinsya kamakalawa ng gabi.
Ang PNP-IMEG ay ang anti-scalawag unit ng PNP na binuo upang tutukan ang internal cleansing ng pulisya kabilang na ang mga pulis na nasasangkot sa illegal gambling.
Muling binalaan ni Casimiro ang kapulisan sa Region 2 na iwasan ang anumang uri ng illegal gambling at iba pang illegal na aktibidades na taliwas sa mandato ng PNP.