MANILA, Philippines - Halos nagmistulang uling na nang matagpuan ang bangkay ng 10-anyos na si Frederick Sumagang na isang ‘special child’ nang makulong ng apoy sa loob ng nasusunog nilang bahay kahapon ng umaga sa Brgy. Bulacao, Cebu City.
Batay sa ulat, bandang alas-5:00 ng umaga nang maganap ang sunog sa ikalawang palapag ng bahay ng pamilya Sumagang na matatagpuan sa Sitio Cabancalan I, Brgy. Bulacao na mabilis na kumalat at tumupok din sa nasa 39 kabahayan sa lugar.
Nabatid na sa sobrang pagkataranta ay hindi napansin ng ina na si Joanry Sumagang na hindi kasama ang biktima sa pagtakbo sa nasusunog nilang bahay.
Naapula ang sunog matapos ang mahigit 20 minuto at inaalam pa ang sanhi ng sunog.