MANILA, Philippines – Isang kandidatong konsehal ng bayan ang nasawi nang ito ay pagbabarilin ng tatlong hindi pa nakilalang lalaki kamakalawa ng gabi sa Upper Tungawan, Zamboanga Sibugay.
Nasawi noon din dahil sa mga tama ng bala ng kalibre 45 sa iba’t ibang bahagi ng katawan ang biktimang si Arnel Dela Cruz, 47, Brgy. Chairman sa Brgy.Upper Tungawan at kandidatong konsehal sa halalan sa Mayo.
Batay sa ulat, bago nangyari ang pamamaril dakong alas-6:15 ng gabi sa Purok 4, Brgy. Upper Tungawan ay lulan ng motorsiklo ang biktima nang sundan at pagbabarilin ng tatlong salarin na magkakaangkas sa isang motorsiklo.
Ang mga suspek ay mabilis na tumakas patungo sa direksyon ng Zamboanga City.
Sa kasalukuyan ay pulitika at personal na alitan ang iniimbestigahang motibo sa pamamaslang.