MANILA, Philippines - Naghayag ng suporta ang grupong El Shaddai na pinamumunuan ni Bro. Mike Velarde para sa kandidatura sa pagkapangulo ni Vice President Jejomar Binay sa darating na presidential elections sa Mayo.
Ito ang inihayag ni Mel Robles, pangulo ng Buhay partylist, at isa rin lider ng El Shaddai sa ginanap na boodle fight sa Juliana Market sa Quezon City, na dinaluhan din ni Buhay partylist Rep. Lito Atienza.
Naniniwala si Robles na ang kailangan ngayon ng bayan ay isang magaling na lider na nagmamaneho tungo sa kaunlaran.
Anya, ang lahat ng Filipino ay gustong guminhawa ang buhay kaya dapat ay pumili ng tamang lider sa darating na eleksyon sa Mayo.
“Kami po sa Buhay partylist ay naniniwala kasama si Cong Lito Atienza na ang kailangan lang po ng bayan natin ay magaling na lider, yun pong nagmamaneho tungo sa kaunlaran” wika ni Robles.
Si Robles ay siya ring third nominee ng Buhay partylist at siya ring nangunang partylist noong 2013 elections kaya sila lamang ang mayroong three seats sa Kamara sa kasalukuyan.