MANILA, Philippines – Isang nagbabakasyong tauhan ng Philippine Air Force (PAF) ang nasawi matapos itong pagbabarilin sa likod ng simbahan ng hindi pa nakilalang mga armadong salarin na hinihinalang miyembro ng Abu Sayyaf Group (ASG) sa Brgy. San Raymundo, Jolo, Sulu kamakalawa ng hapon.
Ang nasawing biktima ay kinilalang si Air Force enlisted personnel Andrew Burias Nono, 27, nakatalaga sa 15th Strike Wing na nakabase sa Sangley, Cavite.
Batay sa ulat, dakong alas-5:00 ng hapon ay nakatayo ang biktima sa likuran ng Jolo Church sa Brgy. San Raymundo nang biglang sumulpot ang mga armadong salarin at paputukan ito.
Nagawa pang maisugod sa pagamutan ang biktima pero nabigo na maisalba ang buhay nito dahil sa dami ng tama sa iba’t ibang bahagi ng katawan nito.
Nabatid na ang biktima ay humingi lamang ng bakasyon sa trabaho para umuwi sa Sulu.