MANILA, Philippines – Umaabot sa 800 police security escorts na nakatalaga sa mga pulitiko at pribadong indibidwal kaugnay ng gaganaping May 2016 national elections sa bansa ang tatanggalin.
Ayon kay PNP-PSPG Director P/Chief Supt. Alfred Corpuz, ang ire-recall na mga police security escorts ay mula sa mahigit 1,000 nilang mga tauhan na nakadeploy sa mga pulitiko kabilang sa mga kakandidato sa halalan at mga pribadong indibidwal tulad mga kilalang negosyante.
Bibigyan hanggang Enero 11 o sa Lunes ng susunod na linggo para mag-report na sa kanilang tanggapan sa Camp Crame ang nasabing mga security personnel para sa kaukulang accounting .
Inihayag ni Corpuz na tanging ang mga pribadong indibidwal na nabigyan ng police security escorts at ang mga pulitikong tatakbong muli sa anumang posisyon sa gobyerno sa eleksyon ang kanilang tatanggalan ng escorts alinsunod sa isinasaad ng Comelec Resolution.
Batay sa isinasaad sa umiiral na resolusyon ng Comelec tanging ang Presidente, Bise Presidente, House Speaker, Chief Justice, Defense Secretary, DILG Secretary, Comelec Chairman at hepe ng AFP at PNP lamang ang hindi maaaring alisan ng security escorts.