MANILA, Philippines – Natagpuang patay sa ikaapat na palapag ng gusali ang isang 27-anyos na lalaking call agent matapos umanong tumalon mula sa ika-10 palapag ng gusali na pinapasukan nito kahapon sa Makati City.
Ang nasawi ay kinilalang si Wilson Binauhan, may-asawa, call center agent sa Skykes Marketing Incorporated, na matatagpuan sa 5th Floor, Glorietta 1, Ayala Center ng naturang lungsod at nakatira sa #226 Calumpang Cerca, Indang, Cavite.
Batay sa ulat, dakong ala-1:20 ng madaling araw nang matagpuan ang biktima na wala ng buhay ng ilan niyang kasamahan sa roof deck ng ikaapat na palapag ng Glorietta 1, Ayala Center ng naturang lungsod.
Hinihinalang mula sa non-smoking balcony, pantry area sa ika-sampung palapag ng naturang gusali posibleng tumalon ang biktima. Patuloy ang imbestigasyon ng pulisya kung may foul play sa insidente.