MANILA, Philippines – Napatay ng isang pulis ang isang lalaking desperado matapos na i-hostage ang isang 9-anyos na batang lalaki sa loob ng isang restaurant sa Angeles City, Pampanga kamakalawa.
Ang napatay na hostage-taker ay nakilalang si Jonjon Roncales, tubong Samar.
Batay sa ulat, bago nangyari ang hostage taking dakong alas-9:30 ng gabi ay kumakain ang 9-anyos na biktimang si Ralph Leonard Dy at ina sa isang fastfood restaurant sa Brgy. Balibago, Angeles City nang bigla na lamang sunggaban ng suspek na armado ng patalim ang bata at ginawang hostage.
Nagresponde ang mga operatiba ng Station 4 ng Angeles City Police sa pamumuno ni Sr. Inspector Dante Cabungcal, pero nabigo ang negosasyon na palayain ang bata matapos na magmatigas ang suspek.
Habang tinututukan ng patalim ng nakaupong suspek ang nakatayong biktima na niyayapos nito at sinusugatan na sa mata ng binalikong tinidor na ginawang patalim ay kumilos si Cabungcal at binaril ang suspek na duguang bumagsak.
Kapwa isinugod sa pagamutan ang suspek na idineklarang dead-on-arrival sa tinamong tama ng bala sa balikat at ang batang biktima na nagtamo naman ng bahagyang sugat sa mata.