MANILA, Philippines - Problema ang kinakaharap ng mga high school student ng unibersidad sa Pasig City sa kanilang pagpasok sa Enero 4 matapos masunog ang kanilang eskuwelahan kahapon ng umaga. Batay sa ulat ng Pasig City Fire Department, pasado alas-10 ng umaga nang maganap ang sunog sa high school department ng Arellano University sa Barangay Caniogan, Pasig City.
Unang napansin ng guwardiya ng paaralan na may usok sa canteen kung saan nadiskubreng mula sa kuwarto ng caretaker ang apoy.
Dahil gawa lamang sa kahoy ang gusali kaya mabilis na tinupok ng apoy ang 10 silid-aralan ng unibersidad.
Inaalam pa ng mga pamatay-sunog ang pinagmulan ng apoy na naideklarang fire-out dakong alas-11 ng umaga.
Wala namang naiulat na nasugatan sa naganap na sunog.