MANILA, Philippines – Napatay ang 32-anyos na helper matapos itong gilitan at saksakin ng tinedyer na lalaki sa footbridge ng Delpan flyover sa Tondo, Maynila kamakalawa ng hapon.
Kinilala ang biktima na si Dante Mendoza, may-asawa, helper sa JRV Forwarding at nakatira sa Block 68 Excess Lot sa Barangay Fatima 3, Dasmariñas City, Cavite.
Arestado naman ang suspek na itinago sa pangalang Tony, 15, kasamahan ng biktima at residente ng Purok 2, Isla Puting Bato sa Tondo.
Sa ulat ni PO3 Michael Maraggun ng Manila Policer District-Homicide Section, dakong alas-4:30 ng hapon nang maganap ang krimen sa nasabing lugar.
Sa imbestigasyon, natiyempuhan ng suspek ang biktima nang muli silang magkasama bilang helper sa JRV Forwarding company.
Lumilitaw na dalawang beses na umanong di binigay ng biktima ang sahod ng suspek sa una nilang pagsasama sa nasabing construction firm kaya nagtanim ito ng galit at isinagawa ang pamamaslang.
Nagtangkang tumakas ng suspek subalit isinuko siya ng sariling ina sa mga awtoridad.
Narekober sa crime scene ang duguang patalim na ginamit ng suspek sa pamamaslang.