MANILA, Philippines – Pinabulagta ang 27-anyos na lalaki matapos itong pagtulugangang saksakin ng mag-aama kaugnay sa pinagtalunang videoke sa birthday party sa Barangay Pasong Tamo, Quezon City, kamakalawa ng gabi.
Base sa ulat ng Quezon City PNP, kinilala ang biktima na si Bryan Linde ng #137 Pantranco Compound, Himlayan Road sa Barangay Pasong Tamo sa nasabing lungsod.
Isa sa mga suspek na si Reynante Riota ang nadakip habang pinaghahanap ang kanyang tatay na si Miguel Riota at kapatid na si Roberto Riota.
Ayon kay PO3 Mendoza, lumilitaw na naganap ang krimen sa kahabaan ng Pantranco compound sa Himlayan Road ganap na alas-6:30 ng gabi.
Ayon sa pulisya, dumating ang biktima sa birthday party ni Renante kung saan kaagad na pinatay nito ang videoke na ginagamit na sound system.
Nagalit ang suspek na si Miguel at kinompronta ang biktima kung saan nakisali na ang dalawang suspek kung saan nauwi sa pananaksak.
Naisugod pa sa Quezon City General Hospital subalit idineklarang patay ang biktima.