MANILA, Philippines – Nadakip ng mga otoridad sa isang operation sa Mandaue City, Cebu noong Sabado ng gabi ang dalawang Romanian na umano ay miyembro ng notoryus na cyber crime syndicate na sangkot sa pagnanakaw ng pera sa Automated Teller Machine (ATM).
Kinilala ang mga nasakoteng suspek na sina Petru Loan Uveges, 43; at Stefania Mihaela Osman, 36.
Ang mga suspek ay nasakote sa akto ng mga tauhan ni Sr. Supt. Marlon Tayaba, CIDG Region 7 habang nagwi-withdraw ng mga pera sa ATM machine gamit ang mga cards na illegal na napasakamay ng mga ito.
Nasamsam mula sa mga suspek ang P52,000.00; 67 piraso ng British export cards, isang Metro Bank Master card na nakapangalan kay Uveges, isang UniCredit Tiriac Bank at tatlong piraso ng Security Bank ATM.
Nakuha rin mula sa mga ito ang tig P 10,000.00 slip sa transaksyon sa Metro Rewards card na nakapangalan naman kay Osman; Rustan’s card na nakapangalan kay Mihaela Paroan, Romanian drivers license na nasa pangalan din ni Osman, driver’s license, kulay puting Toyota Innova, mobile phones at iba pa.
Ang mga suspek ay mga notoryus na miyembro ng Romania Cyber Crime syndicate na nag-o-operate sa Cebu na ang modus operandi ay ang mag-withdraw ng pera sa mga ATM ng mga bangko gamit ang British export cards upang magnakaw sa mga biktimang nagmamay-ari ng international bank accounts.
Ang mga suspek ang ikalawa at ikatlong Romanian na miyembro ng sindikato na nasakote matapos naman ang pagkakaaresto kay Gheoghe Adelin Stretsu, isang Romanian economist ng Cebu Police noong Setyembre ng taong ito.