MANILA, Philippines - Pinasok ng tatlong kalalakihan kabilang ang manugang ang bahay ng kanyang biyenan at walang awang pinagbabaril na ikinasawi ng apat na miyembro na naganap kahapon ng madaling araw sa Banguigui, Sulu.
Ang mga nasawi ay kinilalang sina Junaid Ayyub, 52; anak nitong sina Auja, 16; Almasin, 10 at Adzar Sanani, 3.
Ang mga nasugatang biktima na isinugod sa pagamutan ay sina Alnaid, 15 at Rena, 9, pawang mga anak ni Junaid.
Batay sa ulat, dakong ala-1:00 ng madaling araw nang pasukin ng tatlong armadong salarin na isa rito ay kinilala sa alyas na Asan na mula sa bayan ng Omar at walang habas na pinagbabaril ang mga biktima gamit ang M-16 rifle.
Lumalabas sa imbestigasyon na ang ugat ng masaker ay nang maghiwalay ang suspek na si Asan at misis nito na anak ni Junaid.
Dahil sa wala nang pag-asa na magbalikan si Asan at ang misis nito ay hiniling ng una na ibalik na lang ang ‘dowry’ na ibinigay nila sa pamilya Junaid ng magpakasal silang dalawa.