MANILA, Philippines – Magkasunod na napatay ang dalawang lalaki matapos na pagbabarilin ng mga di-kilalang kalalakihan habang nakatayo sa waiting shed sa Barangay Malagasang 1-D, Imus City, Cavite kahapon ng madaling araw.
Kasalukuyang bineberipika ang pagkakakilanlan ng mga biktima na nakasandong itim, white short pants at may tattoo na bungo sa kanang braso at kaliwang kamay.
Samantala, ang ikalawang biktima naman ay naka-puting tribal t-shirt at marron tribal na short pants, gray na cap at may tattoo rin ito sa dibdib.
Ayon kay PO2 Jeremiah Baniasia, nakatayo ang dalawa sa waiting shed na animoy’ may hinihintay nang lapitan at pagbabarilin ng mga di-kilalang lalaki bandang alas-2 ng madaling araw.
Ayon sa ulat, hindi nakatira sa nabanggit na barangay ang dalawa dahil walang nakakilalang mga residente.
Narekober sa crime scene ang ilang basyo ng bala ng cal. 45 pistol.