MANILA, Philippines - “ Paano na-release ang mga container van na naglalaman ng kuwestiyonableng dokumento”?
Ito ang tanong ng ilang broker na nakabase sa Bureau of Customs (BoC) at hinihingan ng paliwanag si Department of Trade and Industry (DTI) Undersecretary Victorio Mario Dimagiba kung bakit nangyari ito.
Ayon sa ilang broker sa BoC,pinayagan umano ng DTI na ma-release ang libu-libong container vans, na naglalaman ng mga plywood gayung hindi umano ito dumaan sa inspection ng Bureau of Philippine Standard (BPS) at kuwestiyonable pa umano ang ilang mga dokumento nito nagtatanong din ang mga ito kung ano ang koneksiyon ni DTI Undersec. Dimagiba sa isang Manny Santos at Paul Teves.
Ayon pa sa grupo ng broker dapat din ipaliwanag kung bakit inisyu ang Memorandum Order 752 habang ang director ng BPS ay nasa ibang bansa na naging dahilan umano upang maabsuwelto sa Show Case Order (SCO) ang mga kumpanya nina Santos at Teves.
Ang BPS ay ang departamentong nasa ilalim ng pamahahala ng DTI.
Nais ng ilang broker sa BoC na linawin ang umano’y ilang kuwestiyonableng hakbangin ng DTI sa bagay na ito.