MANILA, Philippines - Bulagta ang sinasabing tatlong adik sa bawal na droga habang dalawa naman ang nasa kritikal na kalagayan matapos pasabugin ang pot session sa Barangay Bagong Nayon, Antipolo City, Rizal kahapon ng hapon.
Kinilala ang mga biktima na sina Michael Wong, Arthur “Art” Dela Cruz, at si Ronald Tupino habang naisugod naman sa pagamutan sina Benny Flores at Joel Starling na mga nakatira sa nasabing lungsod.
Sa ulat na nakarating kay P/Supt. Dennis Macalintal, hepe ng Antipolo City PNP, magkakasamang humihithit ng shabu at nag-iinuman ang mga biktima sa loob ng bahay ni Tupino sa Sitio Tagisan 2 sa nasabing barangay nang sumiklab ang pagtatalo sa hindi nabatid na dahilan.
Gayon pa man, isa sa mga biktima ang nagpasabog ng granada na gumimbal sa kalapit na bahay kaya kaagad na rumesponde ang pulisya.
Hindi pa matukoy ng pulisya ang nagpasabog ng granada pero isang nagngangalang Eric Ramos ang inaresto subalit itinanggi nito na siya ang nagpasabog.
Narekober sa blast site ang dalawang granada, mga plastic sachet ng shabu at iba’t-ibang drug paraphernalia.