MANILA, Philippines - Nasangkot muli sa isang aksidente ang aktor na si Vandolph Quizon nang mabangga nito ang dalawang sasakyan kahapon ng umaga sa Parañaque City.
Nasugatan ang biktimang si Michael Pereira, 40, ng #106 Victory Avenue, Tatalon, Quezon City na agad din pinalabas ng ospital dahil bahagyang sugat lang ang natamo.
Batay sa ulat, bago nangyari ang aksidente dakong alas-8:30 ng umaga sa harapan ng PAGCOR, sa North bound ng kahabaan ng Ninoy Aquino Avenue, Barangay Santo Niño ay minamaneho ni Vandolph ang kanyang Toyota Fortuner (UOO-707) nang maplatan ito kaya’t sumalpok sa center island at nasalpok ang parating na motorsiklo ni Pereira at Toyota Hi-Lux (WTB-519) na minamaneho ni Leonardo Tapino, 48.
Magugunita na noong Nobyembre 21, 2007 ay nasangkot din ito sa aksidente na kamuntik na niyang ikamatay.