Nasaktan sa BOI report... P-Noy pinatawag si Magalong

MANILA, Philippines – Inihayag ni PNP-Board of Inquiry (BOI) Chairman P/Director Benjamin Maga­long na nasaktan si Pa­ngulong Noynoy Aquino sa ipinalabas nilang resulta ng imbestigasyon sa Mamasapano incident na ikinasawi ng 44 SAF troopers noong Enero 25 matapos siyang ipatawag noong Martes sa palasyo ng Malacañang kasama si PNP OIC P/Deputy Director General Leonardo Espina.

Ibinulalas umano ni P-Noy ang sama ng loob at nagtanong din kung bakit hindi siya nabigyan ng pagkakataon na magpaliwanag sa isyu.

“ It was a straight forward,  cordial and a   very professional discussion, naramdaman ko  yun  nasaktan siya (President) sa aming report, sino ba naman ang hindi masasaktan” ani Magalong kung saan tinanong din umano siya ni P-Noy kung bakit sa resulta ng imbestigasyon ng BOI ay inakusahan siya ng paglabag sa Chain of Command ng PNP.

Kasama rin sa pag-uusap si Interior and Local Government Secretary Mar Roxas na nasa pagpupulong kasama ang mga miyembro ng PNP-BOI na sina Directors  Catalino Rodriguez at John Sosito.

Ayon kay Magalong na ipinaliwanag niya kay P-Noy na hindi sinisisi ng PNP-BOI  ang Pa­ngulo sa pananagutan nito sa ‘Mamasapano clash’ sa pagkasawi ng SAF 44  manapa’y  tinutukoy lamang sa resulta ng report na  na-bypass ang Chain of Command ng PNP.

“It’s too unfortunate, we will never given a chance na ma-interview si President”, pag-amin pa ni Magalong kung saan sinabi nito na nakalimutan niyang paalala­hanan si Interior and Local Government Secretary Mar Roxas na sabihin kay P-Noy na kailangan ang affidavit nito para matapos na ang im­bestigasyon ng PNP-BOI.

“ The Chain of Command was violated by the President, Purisima (suspended PNP Chief Director General Alan Purisima at SAF Director Getulio Napeñas they kept the information to themselves and delibe­rately failed to inform Officer in Charge P/Deputy Director General Leo­nardo Espina and Interior and Local Government Secretary Mar Roxas, paglalahad sa BOI report.

Magugunita na sinabi mismo ni Magalong na isa si P-Noy sa hindi tumugon sa kanilang imbestigasyon na maka­panayam o ma­hingan ng salaysay para makumpleto na ang kanilang isinagawang imbestigasyon sa naganap na Mamasapano encounter.