MANILA, Philippines - Nakabulagta na may tarak ng patalim sa mukha ang isang tricycle driver nang matagpuan ang bangkay nito sa gilid ng isang gasoline station kahapon ng madaling araw sa Quezon City.
Kinilala ang biktima na si Sixto Calastre Jr., 36, ng no. 56 Mauban St., Barrio San Jose, Caloocan City.
Batay sa ulat, dakong alas-3:00 ng madaling araw nang maganap ang krimen sa Seaoil gasoline station na matatagpuan sa 9513 A. Bonifacio St., kanto ng Scout Alcaraz, Brgy. N.S. Amoranto.
Sa salaysay ng kahero na si Aljon Plaza, nasa loob siya ng teller booth nang may kumatok sa pinto na humihingi ng tulong.
Pagbukas niya ay bumulaga sa kanya ang duguang biktima at sa takot na madamay ay agad na isinara ang pinto, hanggang sa matumba ang biktima.
Ayon sa mga kawani ng gasolinahan ay matagal nang umiistambay ang biktima sa kanilang gas station dahil dito niya ipinaparada ang kanyang tricycle kapag matutulog.