MANILA, Philippines – Namatay habang ginagamot sa ospital ang isang pulis matapos masalpok ng isang sasakyan habang nagmomotorsiklo sa kahabaan ng Aguinaldo Higway, Brgy. Lalaan 1 Silang, Cavite kamakalawa ng gabi.
Ang nasawi ay kinilalang si PO1 Santiago Pangngay Bulayjo, nakadestino sa Tagaytay Police Station at residente ng B. Reyes St., Brgy. 2, Silang, Cavite.
Dinakip naman ang driver ng Isuzu Highlander (URC-524) na si Juanito Rivas Rodulfo Jr., may-asawa, residente ng #55 Dizon St., Bahayang Pag-Asa, Imus City, Cavite.
Sa ulat, dakong alas-6:00 ng gabi ay sakay ang biktima ng kanyang motorsiklo na SYM (2249 DQ) at binabagtas ang patungong Tagaytay habang ang suspek ay patungo naman ng direksyon ng south.
Paliko na ang highlander sa isang gasolinahan nang masalpok ang paparating na motorsiklo ng biktima.
Sa lakas ng pagkasalpok ay tumilapon ang biktima at napuruhan ang ulo sa pagbagsak sa semento.