MANILA, Philippines – Isang magkasintahan ang magsisimbang gabi sana ang naholdap na kung saan ay ginahasa pa ang babae sa harap ng kanyang nobyo kamakalawa sa Bacolod City.
Itinago sa pangalang Alyssa, 18 ang babae habang ang nobyo naman nito ay nagpatago sa pangalang Carlo, 19, na nagharap ng reklamo sa pulisya.
Batay sa ulat, bandang alas-3:30 ng madaling-araw ay naglalakad ang magkasintahan para dumalo sa simbang gabi sa Holy Family Parish Church na matatagpuan sa Brgy. Handumanan.
Bigla na lamang nakaramdan nang tawag ng kalikasan si Alyssa at habang umiihi sa bakanteng lote ay biglang lumabas ang dalawang lalaki mula sa taniman ng tubo at nagdeklara ng holdap.
Tinutukan ng patalim ang magkasintahan at inutusan ang mga ito na maghubad ng kanilang mga damit.
Isa sa mga suspek ang nangmolestiya sa dalaga at ginahasa sa harapan ng nobyo na walang nagawa dahil sa nakatutok ang patalim.
Matapos ang panghahalay ay puwersahang kinuha ng mga holdaper ang sling bag ng babae na naglalaman ng dalawang cellular phones at P140 cash habang kinuha rin ang kagamitan at pera ng nobyo nito.
Nagsampa ng reklamo ang magkasintahan sa Bacolod City Police Station 10 na nagsagawa ng follow-up operation at nasakote ang dalawang suspek na pawang 18 anyos.
Nakapiit na sa detention cell ang mga suspek na nahaharap sa kasong rape with robbery.