MANILA, Philippines - ‘Nakataas na ang dalawang kamay ng mister ko, ibig sabihin ay suko na, pero binaril pa rin siya ng pulis’.
Ito ang inihayag ni Gng. Rochelle Biligan sa MPD-General Assignment and Investigation Section (MPD-GAIS) para ireklamo ang tauhan ng MPD-station 10 na pinamumunuan ni P/Supt. Froilan Uy.
Ang biktima na idineklarang dead on arrival sa Manila Doctor’s Hospital ay kinilalang si Russel Biligan, 36, pedicab driver at residente ng Kahilum II, Pandacan, Maynila.
Batay sa ulat, dakong alas-9:30 ng umaga nang isugod ang biktima sa nasabing pagamutan matapos na ito ay barilin ng mga pulis na nagsagawa ng criminal campaign sa loob ng isang hindi pa tinukoy na sabungan sa Pandacan, Maynila
Sinabi ng ginang na walang damit na pang-itaas ang kaniyang mister nang habulin umano ng mga pulis kaugnay sa iligal na droga at habang nakataas na ang mga kamay ay nagawa pa umanong barilin ito.
Nagsasagawa na ng imbestigasyon ang MPD-Homicide Section sa naganap na pamamaril ng kanilang kabaro.