MANILA, Philippines – Dead-on-the spot ang isang 38-anyos na guro ng high school matapos na ito ay maipit nang mabangga ang sinasakyan nitong motorsiklo ng isang trailer sa kahabaan ng Aguinaldo Highway, Brgy. Buho, Silang, Cavite kahapon.
Ang nasawi ay kinilalang si Cristina Mendoza, 38, dalaga, guro ng Carmona National High School.
Habang nasugatan naman sina Reynante Calliao, 31 at Jaira Cathryn Calliao, 8, grade III student na pawang mga taga-Brgy. Tartaria, Silang, Cavite.
Agad nadakip ang driver ay kinilalang si Bon Brian Legaspi, 36 na may sticker na RMT-188 ang minamanehong trailer heavy tanker (CUX-769).
Batay sa ulat, dakong alas-6:30 ng umaga magkaka-angkas ang mga biktima sa motorsiklo (for registration) ang plaka at pagsapit sa naturang lugar ay bigla na lang umanong nag-U-turn ang nasa harapan nilang pickup dahilan upang ikabig ni Calliao ang manibela pakaliwa at hindi napansin ang paparating na tractor ng suspek at nasalpok sila.