MANILA, Philippines - Natagpuan sa loob ng isang kahon ang bangkay ng isang lalaki na hinihinalang biktima ng “summary execution” sa gilid ng kalsada sa Malabon City kahapon ng madaling-araw.
Patuloy pang inaalam ang pagkakakilanlan ng biktima na inilarawan na nasa pagitan ng edad 40-50 anyos, nakasuot ng itim na short pants, dilaw na sando, at may tattoo na “Commando” sa likod.
Sa ulat, alas-4:20 ng madaling araw nang matagpuan ng mga residente ang duguang kahon sa gilid ng Guava Road, sa Brgy. Potrero, ng naturang lungsod.
Nang respondehan ng mga tauhan ng Scene of the Crime Operatives (SOCO), nakita ang biktima na nakagapos, balot ng masking tape ang buong ulo at may tama ng bala ng baril sa ulo sanhi ng kamatayan nito.
Patuloy naman ang imbestigasyon ng pulisya sa insidente habang umaasa na may lalantad upang kilalanin ang bangkay.