MANILA, Philippines - Pinagbabaril at napatay ng dalawang lalaki ang apat na negosyante ng scrap metal sa loob ng isang KTV bar sa Brgy. San Juan, Mabini, Batangas kamakalawa ng gabi.
Ang mga nasawi ay kinilalang sina Jonathan Tolosa, 37, may-asawa, ng Bauan, Batangas; Cesario Manalo; Isco Ramos na namatay noon din at Miguel Aldovino na namatay habang ginagamot sa Mabini General Hospital.
Ginagamot naman sa ospital ang dalawang nasugatan na sina Rea Bornales, 19, GRO at Marlon Orsal, 41.
Batay sa ulat, bago nangyari ang pamamaril sa mga biktima sa loob ng JVK KTV Bar na matatagpuan sa Brgy. San Juan, Mabini dakong alas-10:00 ng gabi ay naglilibang ang mga biktima nang bigla na lamang silang pagbabarilin ng dalawang suspek na armado ng M16 rifle at carbine rifle.
Tinamaan ng ligaw na bala ang dalawang nasugatan.
Nasamsam ng pulisya ang 40 basyo ng bala ng M16 rifle at carbine rifle sa crime scene.
Sinisilip ng pulisya ang anggulong alitan sa negosyo ang motibo ng krimen.