MANILA, Philippines - Sa halip na magpahuli sa sekyu ay mas pinili umano ng isang obrero na tumalon mula sa ikatlong palapag ng isang mall kamakalawa sa Muntinlupa City na naging dahilan ng kanyang kamatayan.
Ang biktima na idineklarang dead on arrival sa Ospital ng Muntinlupa dahil sa pagkabagok ng ulo ay kinilalang si Amelito Ruaya, nasa hustong gulang, stay-in bilang construction worker sa EEI Project na matatagpuan sa Festival Mall, Filinvest, Barangay Alabang ng lungsod.
Sa imbestigasyon bago ginawa ng biktima ang pagtalon dakong alas-7:00 ng gabi sa ikatlong palapag ng Star Mall ay kainuman nito ang kasama sa trabaho na si John Joseph Denuevo, 31 sa isang convenience store na malapit sa naturang shopping mall.
Nang malasing ang biktima ay inilabas nito ang patalim at hinaharas umano nito ang mga kawani ng convenience store.
Ito ang dahilan kung kaya’t nagsumbong ang isang empleyado sa isang sekyu ng mall.
Pagdating ng sekyu sa tindahan ay wala na ang biktima na umakyat sa ikatlong palapag at tumalon na bumagsak sa unang palapag.
Isinugod ang biktima ng kanyang kasamahan sa nasabing pagamutan, subalit hindi na ito umabot ng buhay.- Lordeth Bonilla-