MANILA, Philippines - Nasawi ang 13 katao kabilang ang labing dalawang estudyante ng high school habang tatlo ang nasugatan nang aksidenteng mahulog ang Ford Fiera (ABF-436) na kanilang sinasakyan sa 300 talampakang lalim ng bangin sa highway Brgy. Bangbangayen, Buguias, Benguet kamakalawa ng hapon.
Ang mga nasawi ay kinilalang sina Jera Flair Mayao,15; Maricel Basatan,13; Jera Madiano,15; Jeribeth Simeon,12, Jasmin Lestino,15; Nenerva Menzi,16; Angie Aguien, 15; Meljoy Agustin,15; Ivonne Bestre, 13; John Ray Dalisdis, 16; Mari Faith Lamsis, 16; Charee Bestre, 15 na pawang mga estudyante ng Poblacion National High School.
Malubhang nasugatan naman sina Reyshan Latuwed,18; Jamerose Bankin,15; kapwa naka-confine sa Baguio General Hospital at Elejoy Agpayasa, 17, ginagamot naman sa Lutheran Hospital.
Batay sa ulat ni Supt. Davy Vicente Lim-mong, Spokesman ng Cordillera Police, dakong alas-5:50 ng hapon ay kasalukuyang bumabagtas sa matarik na highway ang Fiera na minamaneho ni Dalisdis na sinasakyan ng mga estudyante pauwi sa kanilang mga bahay nang magloko umano ang makina ng sasakyan bunsod upang mawalan ng kontrol sa manibela ang driver at tuluyang bumulusok sa bangin.