MANILA, Philippines - Malapitang binaril sa mukha ang isang barangay chairman ng isang lalaki na angkas sa motorsiklo habang nakahinto ang sinasakyan nito sa kanto ng Lacson at Dapitan Sts., Sampaloc, Maynila, kamakalawa.
Hindi na umabot ng buhay sa UST Hospital dahil sa tama ng bala sa mukha na naglagos sa tagilirang bahagi ng ulo ang biktima na kinilalang si Rodrigo Cruz, 59-anyos, ng Severino Reyes St., Sta. Cruz, Maynila at chairman ng Barangay 209. Zone 19.
Sa imbestigasyon ni SPO1 John Charles Duran na naganap dakong alas-11:50 ng gabi habang pansamantalang nakahinto ang Isuzu DMax (ZEG123) na sinasakyan ng biktima dahil red traffic light sa nasabing lugar.
Nasa passenger side nakaupo ang biktima na minamaneho ng isang Danilo dela Cruz, 47, kasama ang isang Norelito Taruca, 50, na opisyal din ng barangay, ang nakaupo sa likod nang ito ay barilin.
Malaki ang hinala ng pulisya na sinundan ng riding in tandem ang sasakyan at nang nakakuha ng tiyempo ay binaril ang biktima.
Hindi nakilala ang dalawang suspek na lalaki dahil kapwa nakasuot ng helmet na magkaangkas sa isang motorsiklo.