MANILA, Philippines - Pinagbabaril ng riding-in-tandem criminals ang isang dating pulis-Malabon habang ito ay nagti-text kahapon ng madaling-araw sa Tondo, Maynila.
Nasawi noon din ang biktima na kinilalang si PO3 Johnny Canseco, dating nakatalaga sa Malabon Police at residente ng 10th Ave., Langaray, Caloocan City dahil sa anim na tama ng bala sa katawan.
Wala pang pagkakakilanlan sa mga suspek na magkaangkas sa motorsiklo na tumakas matapos ang pamamaril.
Batay sa ulat, dakong alas-12:45 ng madaling-araw sa panulukan ng Quiricada at Jose Abad Santos Sts., Tondo, Maynila ay nagti-text ang biktima nang lapitan ng suspek at walang kaabog-abog na pinagbabaril.
Nang matiyak na patay na ang biktima ay sumibad papalayo ang mga suspek sakay ng kanilang motor.
Ang biktima ay natanggal sa serbisyo may tatlong taon na ang nakakalipas dahil sa kasong absent without leave (AWOL).