MANILA, Philippines - Kapwa natagpuang patay ang isang lolo at isang lola sa magkahiwalay na lugar sa Caloocan City at Maynila.
Sa Caloocan City ay nakilala ang nasawing lolo na si Manuel Regualos Jr., 76-anyos, ng Abby II, PNR Cmpd., ng lungsod.
Sa salaysay ng isang Mona Hong, alas-10:30 ng umaga ay naglilinis siya ng bakuran nang mapansin ang biktima na nakahandusay sa loob ng inuupahan kuwarto sa nasabing lugar.
Hindi na ito humihinga nang lapitan ni Hong na naging dahilan upang itawag sa mga pulis.
Sa Binondo, Maynila isang hindi pa nakikilalang lola ang humiga sa bangketa ngunit hindi na nagising pa.
Sa ulat, dakong alas-8:40 ng umaga nang matagpuang patay ng mga tindera ang biktima, nasa 60-70 anyos, may taas na 4’11” hanggang -5”, nakasuot ng printed blouse at kulay itim na tokong at naka-sandals, sa may sidewalk ng Meixic St. kanto ng Juan Luna.
Iniimbestigahan pa rin kung ano ang sanhi ng pagkamatay ng lola.- Danilo Garcia, Ludy Bermudo, Patrick Andal