MANILA, Philippines - Napaslang ang isang mister habang sugatan naman ang kapatid nitong konsehala makaraang pagbabarilin ng hindi pa nakilalang maskarado at armadong riding in tandem sa isang gasoline station sa Lipa City, Batangas kamakalawa ng hapon.
Kinilala ang nasawing biktima na si Arvin Matibag Loria, dead on the spot sa tinamong mga tama ng bala sa iba’t-ibang bahagi ng katawan, habang isinugod naman sa Metro San Jose Hospital si Geraldine Loria Yu, konsehal ng bayan ng Cuenca dahil sa tama ng bala sa kaniyang hita.
Ayon sa pulisya naganap ang pamamaril sa magkapatid sa Brgy. Banay-Banay ng lungsod dakong alas-5 ng hapon kung saan habang nakapila sa gasolinahan ang mga biktima ay biglang nilapitan ng mga suspects na nakasuot ng kulay itim na helmet at pinagbabaril.
Napag-alaman na kadadalo lamang ng magkapatid sa paglilitis ng korte hinggil sa kaso ng illegal possession of firearms na isinampa laban kay Loria ng Criminal Investigation and Detection Group (CIDG) Batangas ng mangyari ang insidente.
Una ng nakakatanggap umano ng death threats ang konsehala kaya nagpa-escort sa kapatid.
Matapos ang insidente ay mabilis na nagsitakas ang mga suspects patungo sa hindi pa malamang destinasyon. Isinasailalim pa ng mga awtoridad sa masusing imbestigasyon ang motibo ng krimen.