MANILA, Philippines - Isang lalaki na umano’y kilabot na snatcher sa Maynila ang nasawi matapos siyang maaresto at pagtulungang gulpihin ng taumbayan kamakalawa sa Sta. Cruz, Maynila.
Ang nasawi ay kinilalang si Alfredo Simbulan, 44, ng no. 931 St. Mary St., Asuncion, Tondo, Maynila.
Sa ulat, bago naganap ang insidente dakong alas-6:00 ng umaga sa C. M Recto Avenue noong Lunes ay hinablot ng suspek ang cellphone ng security guard na si Edwin Arogante na noo’y naglalakad.
Humingi ng saklolo si Arogante at hinabol naman ng mga vendors na nasa lugar hanggang sa makorner at gulpihin ng nasa 20 katao ang suspek.
Lantang gulay bago tinigilan ang suspek at dinala sa ospital, subalit idineklarang dead-on-arrival.