MANILA, Philippines - Hinoldap muna bago ginahasa ang isang 25-anyos na bakla ng isang pulis kamakalawa sa Pasay City.
Sa salaysay ng biktima na itinago sa pangalang Sophie, dakong alas-10:30 ng gabi ay nakatayo siya sa kanto ng Edsa at Zamora St., habang hinihintay ang kasama sa trabaho nang sitahin siya ng suspek na si Danilo Ferrer, na nagpakilalang SPO3 Sto.Tomas ng Police Community Precinct 1.
Isinakay umano siya ng suspek sa isang taksi at sa halip na dalhin sa presinto ay sa garahe ng bahay nito sa Solitarya St., sila nagtungo.
Pinasakay siya ni Ferrer sa nakagaraheng van at sa pamamagitan ng pananakot, pinaghubo’t hubad siya at puwersahang pinagawa ng oral sex.
Nang makaraos, puwersahang tinangay ng suspek ang P300 na pera at relos na nagkakahalaga ng P7,000.
Dito na siya isinakay ng suspek sa isang tricycle at dinala sa EDSA Rotunda dakong ala-1:00 ng Linggo ng madaling araw at saka iniwan.
Isinumbong naman ng biktima ang nangyari sa kapatid nitong pulis na nakatalaga sa Pasig City Police at natunton naman nina Insp. Cesar Teneros ng Intelligence Unit ng Pasay police ang bahay ni Ferrer na nagresulta sa pagkakadakip dito.
Kinasuhan ng rape, robbery at usurpation of authority ang suspek.