MANILA, Philippines - Dinukot ng mga armadong kalalakihan na nagpanggap na mga sundalo ang isang Indian trader kamakalawa ng gabi sa Brgy. Sarmiento, Parang, Maguindanao.
Kinilala ang biktima na si Krishan Singh Arora, 54-anyos.
Batay sa ulat, bandang alas-8:45 ng gabi nang bigla na lamang sumulpot ang mga armaÂdong kidnapper na nakaÂsuot ng camouflage uniform at nagpanggap na sundalo sa compound ng Eversun Plywood Factory sa Brgy. Sarmiento ng bayang ito.
Walang nagawa ang biktima matapos itong tutukan ng baril at kaladkarin ng mga armadong kidnapper na tinangay patungo sa hindi pa malamang destinasyon.
Nabatid na nais ng biktima na buksan muli ang pabrika ng plywood na dating pag-aari ng negosÂyanteng Koreano matapos itong magsara may isang dekada na ang nakakalipas dahilan sa problema sa pangasiwaan nito.
Matapos na mabili ang nasabing pabrika may ilang buwan na ang nakakalipas ay inaayos ng biktima ang pag-oorganisa ng panibagong grupo ng mga tauhan upang muli itong mag-operate.
Sa kasalukuyan ay hindi pa kumokontak ang grupo ng mga kidnapper sa pamilya ng biktima.