MANILA, Philippines - Tiklo ang isang 27-anyos na babae matapos ang isinagawang buy-bust operasyon ng Philippine Drug Enforcement Agency (PDEA) sa Legaspi City, kahapon.
Ang notoryus umanong suspect ay nakilalang si Jamilah Lidas, alyas JM/Bagsik, dalaga at residente ng Block 25, Lot 1, Sultan Esmael, Dasmariñas City, Cavite.
Ayon kay PDEA Director General Undersecretary Arturo G. Cacdac Jr., nadakip ang suspect ng mga tauhan ng PDEA Regional Office 5 matapos ang operasyong isinagawa sa isang kuwarto sa Rizal St., Barangay 23, Imperial Court, Legaspi City, dakong alas-2 ng hapon.
Nakuha mula kay Lidas ang isang malaking plastic sachet na naglalaman shabu na may bigat na 75-gramo at nagkakahalaga ng P405,000. Sasampahan naman ng kasong paglabag sa section 5, Article II ng Republic Act 9165 o Comprehensive Dangerous Drugs Act of 2002.
Samantala, alas-4 ng hapon nang maaresto ng PDEA ang mag-asawang sina Godofredo Balaono, alyas Faisal Sulayman, at Rowena Balaono, alyas Rohaida Sulayman na nakuhanan ng tatlong piraso ng plastic sachet na naglalaman din ng shabu sa may Sorsogon City.