MANILA, Philippines - Pinagbabaril ang isang construction worker ng umano’y dating nobyo ng kanyang misis kahapon ng madaling-araw sa Muntinlupa City.
Namatay habang ginagamot sa Muntinlupa City Medical Center ang biktimang si Vic Joseph Escasinas, 20, nakatira sa #362 Summitville Subdivision, Gonzales Compound, Barangay Putatan ng naturang siyudad. Nagtamo ito ng maraming tama ng bala sa iba’t ibang bahagi ng katawan.
Batay sa ulat, ala-1:20 ng madaling-araw ay naglalakad ang biktima sa kahabaan ng Marcos Avenue, Summitville pauwi sa kanilang bahay nang sumulpot ang suspek at walang sabi-sabing pinagbabaril ito.
Agad na tumakas ang suspek habang ang biktima ay isinugod ng ilang taong nagmamalasakit sa nasabing ospital.
Lumalabas sa imÂbestigasyon ng pulisya, na bago ang krimen ay nakaaway ng biktima ang isang alyas Mac-Mac na umano ay dating nobyo ng kanyang misis.
Malaki ang hinala ng pulisya na nagseselos pa rin si alyas Mac-Mac dahil naagaw sa kanya ng biktima ang dati nitong nobya na naging misis ng biktima.