MANILA, Philippines - Ang sino mang Liberal Party (LP) Congressman na hindi susuporta sa Reproductive Health (RH) bill ay posibleng umanong parusahan ng pangulong Noynoy Aquino.
Ayon kay House Majority leader Neptali Gonzales II, ang Pangulo at mataas na opisyal ng LP ang siyang nagsertipika bilang urgent ang nasabing panukalang batas kaya umano nangangahulugan na ito ang kanilang party stand.
Iginiit ni Gonzales, ang LP ay mayroong 92 miyembro sa Kamara at sa kanilang party stand ay mahirap umanong salungatin ito kayat ang sinumang lilihis dito ay posibleng mapatawan ng parusa.
Sa 92 miyembro umano ng LP sa Kamara ay 23 hanggang 26 dito ang hindi pabor sa RH bill.
Tiwala naman si Gonzales na ang mahigit sa 20 LP members ay mababago pa ang pananaw pagdating ng botohan sa plenaryo.
Gayunman, hindi masabi ni Gonzales kung ano ang kakaharaping parusa ng mga hindi susunod sa kanilang party stand at sa halip ay haharapin na lamang umano ito ng liderato pagdating ng tamang panahon
“As far as the LP is concerned, it’s about time na sumoporta tayo sa position ng partido,”giit pa ni Gonzales.