MANILA, Philippines - Isang drug adik na tinuturong responsible sa pananaksak at pagpatay sa isang 12-taong gulang na estudyante ang napatay din ng mga tauhang ng Quezon City Police District (QCPD) matapos umanong lumaban sa mga awtoridad, kahapon ng madaling araw.
Ang napatay na adik ay nakilalang si Ruel Habal, 21, nakatira sa Catleya St., Barangay Bahay Toro, Quezon City.
Bago napatay ng mga awtoridad si Habal ay sinasabing pinagtripan nitong saksakin ang kanyang kapitbahay na grade 6 pupil na si Percy Delos Santos.
Nasawi si Percy habang isinusugod sa Veterans Memorial Medical Center (VMMC) dahil sa tama ng saksak ng kitchen knife sa likod.
Sa report ng QCPD Talipapa Station 3, bandang alas-12:00 ng madaling araw naglalakad ang biktima at kapatid na lalaki sa may Catleya St., nang basta na lamang sumulpot sa likuran nila si Habal na lango sa ipinagbabawal na gamot at walang sabi-sabing sinaksak nito ang biktima.
Agad namang nakahingi ng tulong sa mga awtoridad ang kapatid ng biktima at mabilis na nagresponde sa kinaganapan ng krimen at inaresto ang suspek pero nanlaban ito kaya nagkaroon ng sugat sa katawan.
Ganap na alas-3:00 ng madaling araw nang dalhin ng mga awtoridad sa VMMC ang suspek para ipa-medico legal ngunit nang-agaw umano ng baril kaya siya binaril at napatay.