MANILA, Philippines — Ibinulsa ng Cignal HD ang quarterfinals ticket sa bisa ng 25-23, 28-26, 25-27, 25-14 pagdaig sa Farm Fresh sa Pool D ng 2024 Premier Volleyball League (PVL) Reinforced Conference kahapon sa Philsports Arena sa Pasig City.
Bumangon ang HD Spikers mula sa naunang kabiguan papasok sa knockout quarterfinals sa kanilang 5-1 record at inilaglag ang Foxies sa 2-4.
Pumalo si Venezuelan import MJ Perez ng 25 points habang may 14, 13 at 11 markers sina Ces Molina, Rose Doria at Chin Basas, ayon sa pagkakasunod.
“Thank you kay Lord for guiding us the whole game,” ani Cignal coach Shaq Delos Santos. “Siyempre, ito rin iyong mindset namin na kailangang makabawi lang sa pagkatalo namin last game.”
Nakaiwas ang Farm Fresh na mawalis nang agawin ang third set, 27-25, para sa 1-2 agwat sa laro, ngunit kumulapso sa gitna ng fourth frame.
Sa unang laro, inangkin ng Akari ang unang quarterfinals berth mula sa 23-25, 25-15, 25-16, 22-25, 18-16 pag-eskapo sa Galeries Tower.
Bumanat si American import Oly Okaro ng 32 points mula sa 28 attacks at apat na blocks para sa 6-0 kartada ng Chargers.