MANILA, Philippines — Matapos si Olsen Racela, isa pang Barangay Ginebra assistant coach ang hinugot ng University of Perpetual Help System DALTA para sa kanilang men’s basketball coaching staff.
Kinuha ng Altas si veteran Richard Del Rosario para makasama ni Racela sa bench sa darating nilang kampanya sa NCAA Season 100.
Sina Racela at Del Rosario ay mga alagad ni two-time PBA Grand Slam champion coach Tim Cone sa Gin Kings.
Makakatuwang ng 53-anyos na si Del Rosario sa kampo ng Perpetual sina Racela, assistant coach Myk Saguiguit at team manager Scottie Thompson ng Ginebra.
Minalas si Saguiguit na maipasok ang Altas sa Final Four ng nakaraang NCAA Season 99 na pinagharian ng San Beda Red Lions kontra sa Mapua Cardinals.
Hindi na bago si Del Rosario sa collegiate scene matapos gabayan ang College of St. Benilde Blazers noong 2009 hanggang 2012.