Finals seat ibinulsa ng Tropang Giga

MANILA, Philippines — Tuluyan nang naplantsa ang championship showdown ng nagdedepensang Barangay Ginebra at TNT Tropang Giga.

Pinatalsik ng Tropang Giga ang Meralco Bolts, 107-92, sa Game Four ng ka­nilang semifinals series pa­tungo sa 2023 PBA Go­vernors’ Cup Finals ka­­hapon sa Smart Araneta Coliseum.

Nagsalansan si import Rondae Hollis-Jefferson ng 42 points at 11 rebounds, habang may 21 mar­kers si Calvin Oftana kasama ang limang triples para sa 3-1 pagtiklop ng TNT sa kanilang best-of-five semis duel ng Me­ralco.

Nauna nang kinumpleto ng Ginebra ang 3-0 sweep sa San Miguel sa sa­rili nilang semis wars.

Nakatakda ang Game One ng best-of-seven title series ng Gin Kings at Tro­­pang Giga sa Abril 9.

Nagdagdag si Mikey Williams ng 17 points tampok ang apat na tres at may 16 markers si Ro­ger Pogoy para sa Tropang Giga na nagtayo ng 13-point lead sa third period bago nakadikit ang Bolts sa 86-93 sa 6:31 mi­nuto ng fourth quarter.

Sinandigan ng TNT sina Hollis-Jefferson at Williams para iwanang mu­li ang Meralco sa 105-92 sa huling 44 segundo.

Pinamunuan ni import KJ McDaniels ang Bolts sa kanyang 37 points.

Nag-ambag si Aaron Black ng 19 markers, 7 assists at 5 rebounds at may tig-11 points sina Chris Newsome at Chris Banchero.