MANILA, Philippines — Nagpasabog ang bagong import na si Greg Smith II ng 38 points para akayin ang Rain or Shine sa 122-117 panalo sa Blackwater sa 2023 PBA Governors’ Cup kahapon sa MOA Arena sa Pasay City.
Kumonekta rin si Smith, pumalit kay Michael Qualls, ng limang three-point shots bukod sa 6 rebounds at 5 assists para isampa ang Elasto Painters sa win column sa kanilang 1-4 record.
Nag-ambag si Leonard Santillan ng 16 markers.
“I was kinda worried because he came from a long flight and hasn’t been really competing the last few months,” sabi ni coach Yeng Guiao kay Smith. “I know he’s not in 100 percent shape, but I guess he just proved me wrong and he played his heart out.”
Laglag naman ang Bossing sa ikaapat na dikit na talo para sa 1-5 baraha.
Humabol ang Rain or Shine sa 93-95 sa pagbubukas ng fourth quarter matapos tangayin ng Blackwater ang 95-87 abante sa pagtatapos ng third period.
Nauna nang inilista ng Bossing, nakahugot kay import Troy Williams ng 40 points, ang 10-point lead, 53-43, mula sa triple ni Gab Banal sa 6:09 minuto ng second quarter.
Isang 13-5 atake ang inilunsad ng Elasto Painters para itayo ang 106-100 bentahe sa 7:08 minuto ng final canto tampok ang tres ni forward Nick Demusis.
Huling nakalapit ang Blackwater sa 112-117 galing sa triple ni Baser Amer sa nalalabing 1:02 minuto.