MANILA, Philippines — Namumurong magharap sa finals sina Philippine pride Jason Brickman at Jordan Heading matapos ang panalo ng Kaohsiung Aquas at Taichung Suns sa magkaibang karibal sa semifinals ng T1 League sa Taiwan.
Tinambakan ng Kaohsiung ang Taiwan Beer HeroBears, 114-91 habang umeskapo ang Taichung sa New Taipei CTBC DEA, 102-96 para sa 1-0 bentahe sa kanilang mga best-of-three semifinals series.
Naglista si Brickman ng 19 points, 8 assists, 2 rebounds at 3 steals para giyahan ang balanseng atake ng Aquas.
Anim pang players ang umiskor ng double digits para sa Kaohsiung sa pangunguna ni Lithuanian center Mindaugas Kupsas na may 24 points at may 16-point, 10-rebound double-double si Xavier Alexander.
Susubukan ng No. 1 seed na Aquas na tapusin ang serye ngayong araw sa University of Taipei Tianmu Campus Gymnasium papasok sa championship round.
Posibleng mag-abang sa kanila ang Taichung na pinagbidahan ni Heading sa kanyang 15 markers, 4 rebounds at 2 assists.
Hindi rin nagpahuli si Palestinian star Sani Sakakini sa 33 points at 10 rebounds na ambag pati na si Anthony Tucker na may 30-point, 10-rebound double-double para sa Suns.