Catantan tumusok ng gold sa fencing

MANILA, Philippines — Humirit ng gintong medalya si Pinay fencer Samantha Kyle Catantan sa 2019 Asian Under 23 Fencing Championships na ginanap sa Bangkok, Thailand.

Inilampaso ni Catan­tan si Yu Min Chui ng South Korea sa championship round ng wo­men’s individual foil pa­ra masiguro ang nag-iisang gintong medalya ng Pilipinas sa torneo.

Umabante sa finals si Catantan matapos ilusot ang dikitang 15-14 pa­na­lo laban sa isa pang South Korean bet na si Minseo Choi sa semifinals.

Kabilang din sa mga tinalo ng Pinay fencer sina Natnicha Woravjit ng Thailand sa second round (15-4), Yan Chin-Man ng Chinese-Taipei sa third round (11-10) at Philippa Ong Jiyi ng Ma­laysia.

Nakahirit ng first-round bye si Catantan.

Hindi naman pinalad ang iba pang miyembro ng pambansang koponan na sina Shawn Ni­collei Felipe, Nathaniel Pe­rez, Jaime Viceo, Prince John Francis Felipe, Queen Denise Dalmacio, Allaine Nicole Cor­tey at Elvielyn Joy Javinar.

Nagtapos sa ika-10 si Shawn Nicollei matapos makaabot sa third round sa men’s foil category.

May first round bye si Shawn Nicollei bago igupo si Denis Anatsko ng Indonesia sa second round (15-13) ngunit yumuko sa third round sa kamay ni Tamirlan Ka­liyev ng Kazakhstan (4-15).

Nasa ika-15 naman si Perez, ika-19 si Viceo at ika-22 si Prince John Francis - lahat sa men’s foil din.

Sa women’s sabre, ika-13 si Dalmacio, ika-24 si Cortey at ika-33 si Ja­vinar.