PALEMBANG — Pinatunayan nina Filipino bets John Chicano at Niko Huelgas na sila ang pinakamahusay na male triathletes sa Southeast Asia nang tumapos sa 10th at 16th places, ayon sa pagkakasunod, sa men’s triathlon ng 18th Asian Games dito sa Jakabaring Sport City Shooting Range dito.
Sinagupa ang mga world-rated rivals, nagtala si Chicano, ang silver medalist noong 2017 Southeast Asian Games sa Malaysia, ng bilis na isang oras, 54 minuto at 33 segundo sa 1.80-km swim/20-km bike/10-km run race para itapon ang kanyang personal best na 1:56.00 na inilista niya sa nakaraang Subic International Triathlon.
Pinantayan din ni Chicano ang 10th place finish ni Jonard Sam, nagposte ng 1:59.00 noong 2014 edition sa Incheon, Korea.
Isinumite naman ni Huelgas, ang back-to-back gold medal winner noong 2015 Singapore at 2017 Malaysia SEA Games, ang 1:58.39 para burahin ang nauna niyang 1:59.17 bilang 11th placer noong 2014 Incheon Games.
Ibinasura din ni Huelgas ang kanyang winning time na 1:59.30 para sa ikalawa niyang SEAG gold medal sa Putra Jaya noong 2017.
Si Japanese Junpei Furuy ang sumikwat sa gold medal sa kanyang oras na 1:49.33.